Bókingartreytir

1. Inngangur

VERT hevur gjørt avtalu við eigaran av ognini. Avtalan gevur VERT einarætt til at leiga ognina út til ein leigara. Leigarin skal hava fylt 21 ár tann dagin, leigusáttmálin verður gjørdur.

Vit gera vart við, at VERT ikki eigur ognina, men at ein triðjamaður eigur hana. VERT leigar ognina út vegna eigaran, fyri eigarans rokning og ábyrgd.

2. Leigutíðin

Leigutíðin verður ásett eftir bílegging leigarans ella eftir tær komu- og fráferðartíðir, sum eru upplýstar. VERT boðar leigaranum frá, hvussu lykilin verður útflýggjaður, og nær ognin er innflytingarklár.

Um ikki annað er upplýst, kann leigarin flyta inn frá kl. 15:00. Leigarin skal fara úr ognini í seinasta lagi kl. 10:00 fráferðardagin, um ikki annað er avtalað við VERT.

Leigarin sleppur ikki inn í ognina, fyrr enn øll leigan er goldin.

3. Nýtsla av ognini

Um ikki annað er avtalað við VERT, skal ognin bert nýtast til frítíðarendamál.

4. Gestatal

Um ikki annað er avtalað við VERT, hava bert teir gestir, sum eru við í bíleggingini, loyvi at vera á ognini í leigutíðini.

Tað er als ikki loyvt at seta upp telt, húsvognar ella annað líknandi á leigaðu ognini.

5. Húsdjór

Tað er als ikki loyvt at hava húsdjór við sær á leigaðu ognina, uttan so at hetta er serskilt avtalað frammanundan.

6. Larmur

VERT kann ikki tryggja, at leigarin ikki verður órógvaður av larmi uttanífrá.

7. Internet

Internetsamband er á ognini, um ikki annað er upplýst. Tó hava hvørki VERT ella eigarin ábyrgd, um internetsambandið av eini ella aðrari orsøk ikki er nøktandi.

8. Royking

Tað er als ikki loyvt at roykja á ognini.

Verður roykt á ognini, kann VERT krevja eitt revsigjald á DKK 3.000.

9. Prísir og gjøld

Allir prísir eru í donskum krónum (DKK). Verður goldið kontant í evrum, verður eitt umsitingargjald á DKK 100 lagt omaná.

Leigan verður tikin av kontu leigarans tann dagin, freistin fyri ókeypis avlýsing gongur út. Um ikki annað er upplýst, eru hiti og el íroknað í leiguni, treytað av, at nýtslan er innan fyri rímilig mørk. Tað er ikki loyvt at nýta el til at løða elbilar uttan serligt loyvi.

Við bílegging beinleiðis hjá VERT og gjøgnum Booking.com verður eitt eykagjald á 2,5 % lagt omaná, tá ið goldið verður við vinnukorti ella við privatkorti, sum er útgivið uttan fyri ES/EBS. Við bílegging gjøgnum aðrar bókingarsíður (OTA) umsita bókingarsíðurnar sjálvar møgulig kortgjøld.

10. Beinleiðis bóking á vert.fo

Tá ið tú bíleggur beinleiðis á vert.fo, skrivar tú kortupplýsingarnar í tryggu bókingarskipanina hjá okkum (Beds24), sum lýkur trygdarkrøvini hjá kortvinnuni (PCI DSS). Bíleggingin er váttað beinanvegin, og kortið er trygd fyri bíleggingini.

Leigan verður tikin av kortinum, sum lýst í grein 9. Heimasíðan hjá VERT sær ongantíð kortupplýsingar tínar og goymir tær ikki.

Bíleggingin verður váttað við telduposti.

Avlýsing: Prísurin „Standard – 14 days“ kann avlýsast ókeypis fram til 14 dagar áðrenn komu. Avlýsir tú seinni, verður upphæddin ikki goldin aftur. Prísir við øðrum treytum siga tað í navninum, t.d. „Non-refundable“, sum ongantíð verður goldin aftur.

11. Avlýsing og broytingar

Tær avlýsingartreytir, sum eru upplýstar á teirri bókingarsíðuni, har bílagt varð, eru galdandi. Hetta er eisini galdandi fyri bíleggingar beinleiðis hjá VERT. Avlýsingartreytirnar standa í bókingarváttanini.

Fyri bíleggingar, sum eru gjørdar og goldnar á vert.fo, eru avlýsingartreytirnar í grein 10 galdandi.

12. Mannagongd við fráferð

Leigarin skal lata ognina aftur í líknandi standi sum tá ið leigumálið byrjaði. Reingerðargjaldið fevnir um vanliga reingerð.

Verður tað, sum er nevnt niðanfyri, ikki gjørt við fráferð, kann VERT krevja hesi gjøld. Tey verða tikin av kortinum, sum brúkt varð til bíleggingina, ella kravd inn gjøgnum bókingarsíðuna, alt eftir, hvar bílagt varð.

13. Reingerð, seingjarklæði og handklæði

Leigarin skal lata leigaðu ognina aftur í sama standi sum tá ið leigumálið byrjaði. Leigarin skal rinda tað avtalaða reingerðargjaldið. Hetta gjaldið fevnir tó ikki um uppvask, at tøma uppvaskimaskinuna og køliskápið, at reingera ovn, mikrobylgjuovn og grill ella at bera ruskið út. Verður hetta ikki gjørt, kann VERT krevja eitt eykagjald fyri ta eyka tíðina, sum reingerðin tekur.

Um ikki annað er avtalað, skal leigarin leiga seingjarklæði og handklæði hjá VERT fyri tað gjald, sum er upplýst í bíleggingini.

14. Skaðar

Leigarin skal fara væl um leigaðu ognina og lata hana aftur í sama standi sum tá ið leigumálið byrjaði.

Leigarin hevur ábyrgd mótvegis eigaranum fyri skaðar á ognina og/ella innbúgv hennara, sum henda í leigutíðini, og sum leigarin ella tey, ið leigarin hevur givið atgongd til ognina, hava ábyrgdina av. Leigarin skal boða VERT frá øllum skaðum áðrenn fráferð.

15. Brek á ognini

Ognin verður latin leigaranum uttan brek. Staðfestir leigarin, tá ið hann tekur við ognini, at brek eru á henni, ella at hon ikki er nøktandi reingjørd, skal hann beinanvegin boða VERT frá.

Fær VERT ikki slík boð, verður mett, at ognin er latin leigaranum uttan brek og í góðum standi, og leigarin kann ikki seinni gera krav galdandi um hetta.

16. VERT sum fyritøka

VERT eigur ikki ognina. VERT letur leigaranum atgongd til ognina vegna eigaran og hevur ábyrgd av ognini.

Koma viðurskifti fyri, sum VERT ikki ræður yvir, t.d. tvingsilssøla av ognini ella sáttmálabrot hjá eigaranum, hevur VERT rætt til at siga leigumálið upp. VERT skal tá gjalda leigaranum aftur ta leigu, sum hann møguliga hevur goldið VERT. VERT kann eisini eftir egnum vali bjóða leigaranum eina aðra samsvarandi ogn í sama øki fyri sama gjald.

17. Tilvísingarsamstarv

Vit gera vart við, at VERT veitir tænastur innan tilvísingarsamstarv (affiliate marketing), og at vit tí kunnu fáa umboðsløn ella gjald fyri tilvísingar í sambandi við hetta leigumálið. Hetta ávirkar ikki treytirnar fyri leigumálinum, og slíkar avtalur eru óheftar av skyldum leigarans eftir hesum sáttmála.

18. Force majeure

Í førum við force majeure og/ella óvanligum hendingum ella umstøðum, herundir, men ikki avmarkað til, kríggj, náttúruvanlukkur, onnur óvanlig veðurviðurskifti, ferðsluteppur, farsóttir, at ferðing til Føroya er steðgað, broytt flutningsviðurskifti, verkfall og verkbann, kunnu VERT og/ella eigarin siga leigusáttmálan upp uttan at hava ábyrgd av, at sáttmálin ikki verður hildin – eisini um slíkar óvanligar umstøður kundu væntast, tá ið leigusáttmálin varð gjørdur.

Hvørki VERT ella eigarin hava ábyrgd av viðurskiftum, sum ikki viðvíkja leigaðu ognini. Hetta fevnir um, men er ikki avmarkað til, byggiarbeiði nær ognini, streymslit, handlar ella aðrar tænastur til ferðafólk, sum fyribils eru stongd, umframt innbrot, stuld av lutum leigarans ella skaða á teir.

19. Varnarting og lógarval

Øll ósemja, allur ágreiningur og øll krøv, sum stava frá ella viðvíkja hesum sáttmála, herundir broti á sáttmálan, uppsøgn ella ógildi hansara, skulu leggjast fyri Føroya Rætt í Tórshavn. Føroysk lóg er galdandi fyri ósemjuna.

Gildi, tulking og útinning av hesum sáttmála fylgja føroyskari lóg.